‘A LENGUA MIA
Ogni riferimento a persone, cose e fatti è puramente casuale.
‘A LENGUA MIA
Sapisseve che llotte che facc’io
cu ‘a lengua mia – Meglio ca nun parlasse -
ca si nun fosse ‘nu peccato ‘e Dio,
io, mo, senza penzarce, m”a tagliasse,
pecché parecchie guaje m’ha cumbinato,
parlanno senza freno e apertamente,
tutt”e cumpagne m’hanno abbandunato,
pe’ colpa ‘e chesta lengua indisponente.
- Nun parlà male – lle dich’io ogni tanto.
- Nun me fa appiccecà cu tutt”a gente,
mo mme saluta fratemo sultanto,
famm”o restà chist’urdemo parente -.
Ma chella traseticcia e capricciosa,
nun se vò maje fermà, manco ‘n’istante,
nfi’ a quanno nun ha ditto tutto cosa
cuntanno peste e ccorne a tutte quante.
È peggio d”a cecuta e d”a grammegna.
Parla sultanto quanno po’ fa male.
Dice: – Chi tene lengua va ‘nSardegna -
Ma io cu chesta, vaco a Puceriale.
Alberto Arrichiello
