Salviamo Peter Pan

No, nun è ‘o ppoco ‘e sole ca sta trasenno,
nun è ‘o ccantà arrecriato d’’e cardille…;
nun è ll’acqua ca s’ammesca cu ‘o viento
e nnemmanco ‘a museca d’ ‘a campana;
nun ce azzecca ‘o ricordo appicciato
‘e chillu sbrennente scarpinetto
o ‘e penziere d’’a libbertà;
gnernò, no, chesta tene cchiú cculore,
ch’ è cchiú cauro e sta cchiú ‘ncoppa,

sta ‘mmiezo a cchillu Paraviso.
Chillo Paraviso:
ddoje stelle chiene ‘e ducezza,
ll’ avvampore d’ ‘a pelle
e l’addore d’’e sciure
‘nfilate dint’ê zirule
ca lle tenono cumpagnia,
e‘a fanno ‘a connola d’ ‘a bellezza.
Ma i’ nun accapezzo:
‘a ddo’ è asciuto ‘stu panaro?
‘e qua’ manera te fa jí all’atu munno,
‘int’â ‘rraggia o ‘int’ô cunzuolo,
‘miez’ ê pporte ‘e casadiavulo
o d’’o Pataterno?O pure ‘ncopp’â luna?
Chella è accussí piccirella, accussí ttoma,

nun s’ è ‘mparata a s’acquattà,
nun ‘o sape ca sulo se lle vene ‘ncapa ‘e parlà,
allumma ‘na trunata,
e ppo, nun ‘o ssape ca si se spassa
o se mette a vasà,
tanno addeventa ‘nu panteco, ‘nu patemiento,
pecchè i’ ‘a cunosco,
i’’o ssaccio ca chella priezza
m’attocca sulo dint’ô suonno, ‘e notte.
Aggi’ ‘a tené mente, aggi’ ‘a sapé,
e pe cchesto ca â penzo
e nun ‘ntenno s’è ‘na bbona refosa;
si sento cca vvicino
chell’addore d’e percoche
ca supera tutti ll’ati prufume!
Nun songo chiú ll’aspierto,

‘o professore ca raggiona,
‘o petrusiniello ca vo’ addimannà e vvo’ sapé…;
addevento l’urdemo sciascillo,
‘o cafariello ‘ncafurchiato ‘e chillu schianto,
‘o peggio d’’e tuccate…
Sultanto pe ‘nu vaso!
Forze è ppe cchesto ca mme vene d’alluccà,
‘e annasconnere ‘a verità
dint’â neglia d’ ‘e penziere,
e cu ‘a fantasia, ‘a vaco ascianno,
‘a veco, ‘a sento, ‘a maneo, sta cca,
sta ‘mmiezo a ‘stu mare ‘e chiacchiere superchie…,
me sta aspettanno dint’ ê buscie faveze

‘e tanti e ttanti vase ca friccichejano
‘ncopp’a sta brutta faccia d’ ‘a mia!
No, nun è ll’onna ca chiagne
o ‘e ccerase nere e ssapurite
nun è l’alleria ca cummoglia ‘e stierne ‘e dimane
e nemmanco ll’uosemo d’ ‘a terra…,
nun ce trase ‘o juoco streuzo d’’a furtuna cecata
o ‘o gulio preputente d’a staggiona,
gnernò, no, chesta cca, tène cchiú culore,
ch’ è cchiú cauro!

È ‘a vocca toja, ‘o chiuovo mio,
e sta lla ‘ncoppa, miez ‘a chillu Paraviso…

cammenanno, cammenanno…